BEN's profile蓝™PhotosBlogListsMore  |  Tools Help |
|
|
09 November 香港長跑會第32屆香港地標半馬拉松另一個第一次，去年第一個半馬比賽就係呢個「長跑會第31屆半馬拉松」，加上今次入咗老人組，組別有利，所以一早報名兼部署，天時暑熱都繼續練，打算做好成績。可惜世事難料，首先有跑網師兄要求玩隊際，雖然報咗個人，如果同意就幫我再遞紙，會安排入A隊，既然唔使我理就由得佢攪；之後左膝受傷發炎，迫住停操兩星期，最近病情好轉，急急加操，可惜未夠里數之餘，狀態仍處低位。其後得知隊際要計算全隊名次，即係要全隊完成至可以爭標，自己有傷在身，狀態未起，唔好話做好成績，可唔可以完成都成問題。 前星期玩活力10k，時間要42'幾，時間慢外，仲跑到死死下，為加里數及增加耐力，點都要走轉廿K長課至放心，早幾日最後一課LSD，去到17K就無油，隻腳又只得八成功力，好想搵藉口退出，但始終都無開口，但心理壓力越來越大。呢兩日可以做嘅只係早上牀，休息多啲，希望隻腳快啲好，到時跑得幾多得幾多。 尋晚8點晚飯食咗3大碗飯，9點幾就上牀瞓，430起身煮個麵打底先出門食早餐，去到大尾篤攞號碼布寄行李，簡單熱身後就開跑，今日戰術係死留，一定要捱到終點。起步無耐就上斜，因為企得前，附近跑手水平又唔低，所以上斜無話爭先恐後，大家都係勒住勒住，到落斜位，開始有人發力，自己亦被某幫會兩個目標人物過頭，自己知自己事，今日邊有本事留住人，5K/22'XX，預算之內。轉入烏蛟騰，見到回程啲人距離又唔係太遠，出烏蛟騰右轉落鹿頸，10k/44'xx，1:30'無望，但仍然預計時間之內。半程無睇錶，只因要專心上條長命斜，一路拍住女子第五名一齊走咗好耐，上斜明明過咗佢，但始終放佢唔甩，一到平路又被該女跑手爬頭，就搭順風車，再入烏蛟騰仍可以under control，15k/1:09'，離開烏蛟騰前，見路邊有篤狗屎，心想咋諦避狗屎扑街，上白車咪可以唔使跑囉，不過始終都係幻想，亦可能係中暑休克前嘅徵兆。 最後5k應該係最關鍵，係17k爆定20k爆就睇呢段，一路跟到左轉出新娘潭路，一上斜又過番佢，到落斜又被佢過，但今次唔可以再坐順風車，自己開始無油，落斜係強項都無作為，個腦開始模糊，成日形住前面仲有上斜，叫自己留住留住，對腳又遞唔起，只係好機械性麻木的不斷將後腳向前踏，如果呢一刻休克暈低，我諗對腳都會不停向前踏，離遠見到前面幾個跑手都開慢車，包括第五位女跑手，其中一個仲係行添，但自己硬係連一個都追唔到，最後500米對腳好似唔係自己，只好不停擺手，好似用雙手跑咁，自己雖然好似跑緊返終點，但速度同附近行緊嘅人士差唔多，最後100m，真係忍唔住，望返後邊，見無追兵，索性收步慢jog返終點，留番條命下次搏過。 完事按錶，1:33'30，同去年第一次一樣！？里數不足，狀態低沉，有傷在身，都可以走1:33'，忡走入隊際第二，對得住自己，對得住觀眾啦，但再想深一層，玩咗成年時間，仍毫無寸進，係咪代表呢個時間就係極限呢？
27 October 飛躍活力10公里長跑比賽首次下海嘅處女賽，就係前年呢場嘅「活力10公里」，當時跑出嘅時間係52分鐘，一年後(08年)好想再參加，可惜主辦機構無搞，今年唔多想玩，佢就搞番，世事往往係咁。點解今年唔想玩？主要原因受膝頭傷患困擾，加上轉向玩三項，對跑步興趣無咁大，不過話晒係下海賽事，點都要走走，對比一下外，亦作為對自己第一次走上賽道的紀念跑。可惜今日完全唔值得紀念，因為輸咗，仲輸得好慘。 膝頭哥痛咗個幾月，終於忍唔住去睇醫生同照X-ray，星期二睇報告，個獸醫剩係睇份報告，望都無望我對腳，又唔聽我講，我見份報告得行半字，個獸醫睇完就話有輕微退化，無其他嘢，可以走，有痛就食藥搽藥膏，唔使再嚟；痛咗個幾月都話無事，都唔知點好。前日做12分鐘測試，跑時都留住留住，點知禽日痛到行唔得，今朝瞓醒個屁股仲扯住扯住，時間無多，點都要去比賽場地，最多去到唔跑。 大尾篤定大美督？好似好耐無去跑，一條2k嘅堤壩，做時間一流，去到無耐就見到幾個同水平跑友，另外仲有幾個熟口面，從未贏過自己嘅跑友，因為肌肉扯得好緊同有啲痛，所以加多幾錢肉緊做熱身，等起跑時都唔敢企咁前，一起步都係順住走，開跑無耐就過咗首席女跑友同佢拍拿，可能自己開得太快，即時收慢些少，離遠見到幾個同級跑手同次自己一級嘅跑友响前邊，就跟住佢地尾，去到壩尾仲跟到成班目標人物，再走1k掉頭，仍然保持百多米內，再落壩頭半程，開始走甩幾個，自己體力亦走下坡，一路上努力控制呼吸，調整姿勢，但仍然好辛苦，半程好想上岸，開圈唔敢跑快，留咗力都捱唔到10k？第二次去壩尾，只可以見到三個從未贏過自己嘅跑友，第二次上山未掉頭時，見到幾個同級同次一級跑友一個一個回程，睇嚟佢地開始發力，連次一級嘅跑友都可以開得咁快，自己跟都跟唔到，去到最後直路2k，剩番兩個可以見到，諗住見到燈尾都可以爬頭，點知自己有心無力，50米距離，兩公里咁長跟足全程都過唔到頭，輸得好慘，仲要輸比從未贏過自己嘅跑手，真係傷心，好想放棄，呢個係我第一個比賽，會唔會亦係自己最後一個路跑比賽呢？跑完即刻走人，要去沖涼，好想沖走一切衰氣，沖走這個不愉快經歷，將過去嘅賽事都一一洗刷，我唔想再比賽。 事後上網睇睇資料，時間係42'24，得組別第7，咁嘅時上台攞獎好肉酸，好在走得快。
  20 October 2009香港ITU三項鐵人至尊亞洲盃(半奧運距離)下真係深水起步，起點離碼頭都十幾廿米，想話企响岸邊等開始都唔得，一開始想話照計畫用自由式游足全程，但左右隔離都用蛙式游，為咗保護自己，都要用蛙式游住先，到有空位時又用番自由式游，本應都幾好，因為原本可以過人，可惜自己唔係快，又唔敢博，話晒大海茫茫咁危險，明明過咗對手半個身，但被對手踢兩嘢又要用番蛙式，如是者自蛙輪流用，啲快馬一早上水，自己仲响水中掙扎，上咗水都唔敢望返轉頭，因為唔想知自己係咪最後一個上水，睇下時間，19'XX，預算3'/100m，即係快咗。 離開水面當堂唔同，水上就捱打，陸上就要主動些少，未跑到轉項區都過咗幾個人，戴好頭盔推住單車又過咗幾個，發覺其他人轉項好屎，我咁渣都可以响轉項區過咁多人，時間用咗4'05，上車時仲係跳上去添，跟住就咁搏命踩，其他人仲停低架車慢慢上，但威得唔夠一分鐘，後邊啲車手開始一個一個爬頭，不過好過上次，上次成群咁過，今次隔好耐先有一架過；上次踩車嘅陰影實在太大，真係好驚要落地推車，加上今次條車路有好多暗斜，沿途不停轉波，半奧只踩一個圈，都唔知18k定20k，比起上次「超越挑戰三項鐵人」，條路又長又闊，啲車無上次咁集中，又無人勾車，肉眼所見範圍都係得十零架車，有些少冷清嘅感覺，不過對我幾有利，因為無壓迫感，可以專心踩。踩到最後一公里，見到一齊出發嘅三項同學仔A响隔離跑步區跑緊，就到半程turning point添，真係強，去到落車區睇錶，40'21。 入到轉項區，放低所有嘢，戴帽同黑超就跑，1'50。踩完車再跑步，對腳硬係差多少，開唔到步，唯有密密腳細細步走，跑道上其他人仲慘，大步啲行都快過佢地，約2k位，見到上一組出發嘅另一個三項同學D响對面，佢就弱啲，睇下終點前可唔可以過佢，去到U-turn位掉頭10'57，對腳仲未適應，剩番唔夠2k終於見到三項同學D，對腳亦開始上力，打聲招呼就過佢，進入最後直路，終點前大空地，約500米開始加速，執咗好多件直趨終點，終點有人拉線，加多兩錢肉緊衝刺，衝完仲有工作人員幫你掛獎牌，唔知仲以為自己得獎添，大會真係攪嘢，總時間1:26'02。 玩完都唔得閒，沖身換衫，還車，交晶片，四圍攞嘢食攞嘢飲，又要同人social，不過真係幾好玩，尤其游水，估唔到750m都可以應付，遲下考慮玩渡海泳都好喎。
   19 October 2009香港ITU三項鐵人至尊亞洲盃(半奧運距離)上今次係第二次參加鐵人賽，有咗上個月處女賽經驗，今次明顯發揮得比較好，可以在自己預計時間內完成，雖然係半奧距離，但都好滿足同開心，希望不久將來可以挑戰奧距。繼馬拉松後，下一個目標就係奧距三項鐵人。 今次比賽組別好彩安排於9:50am，就算遠到去迪士尼都唔使驚，不過都要早些少起身準備，530起床，第一件事當然洗臉，跟住執嘢，其實早一晚都執定，但再檢查無乜衰，皆因老人痴呆成日怕執漏，再三檢查之後，煮個去湯公仔麵打底，630出門口去葵芳食早餐，之後搭地鐵，去到迪士尼都未夠8點；個比賽場地實在太大，由碼頭去轉項區成公里，又要試單車，今次比多百五蚊租架roadbike，幾大都踩番夠本；玩三項同跑步心態唔同，跑步好想做時間，但三項只係純粹參與，享受游踩跑嘅樂趣，所以係咁易做簡單熱身就四圍參觀，上年跑「兒童基金半馬」都唔知跑過邊道，原來就係碼頭側邊條長廊，從迪欣湖過嚟經迪士尼正門大街再去停車場。 時間差唔多，去轉項區放好單車、頭盔、眼鏡、帽、號碼布同鞋，帶住泳帽同泳鏡就去碼頭聽briefing，今次比賽同上次有些少分別，今次由鐵人總會搞，明顯較上次專業，參加嘅運動員都pro啲，為咗喱次比賽，自己都專登買咗件戰衣同黑超，租埋架roadbike，睇起上嚟都型啲，上鏡啲。 13 October 44"15/50m人的一生中，總曾試過選擇錯誤，或作出錯誤決定的時候，這次游泳比賽正是眾多錯誤決定其中之一，直至比賽前的一刻，甚至現在。 幾廿歲人從未正式學過游水，每次游水都有個主要原因，就係有傷，唔係手就係腳，肩周炎，筋膜炎，網球肘，拉傷肌肉等等，睇親醫生，個個異口同聲都叫游水，久而久之先識少少游，平時爬爬下游一個塘就休夠再爬，最近玩三項先叫做游密咗，又跟下人操水，咁啱有個游泳比賽，所以胆粗粗報個50m自由式玩下，算係測試自己時間。 話晒第一次玩泳賽，唔知有幾多對手，又唔知對手實力，自己知自己事，最緊要唔好包尾，就算係都唔好差太遠就得。二十蚊報名費，隨時放棄，比賽當日如常起牀，無安排節目，表面係應付這個泳賽，但完全無準備，包括生理同身理，睇埋電視食完早餐，仍然有大把時間，好不情願執埋游水用具出門，途中隨時改變主意都未定。去到青衣泳池睇咗幾組200m比賽就到自己果組召集，即刻換泳衣報到，做熱身等落水，都唔記得自己打算棄權唔玩添。坐响泳線前張凳度，專心一志盤算將要做的每一個動作；第一次企上泳線跳水，仲要俾咁多觀眾望住，好在自己集中精神，所以都唔識驚，手板眼見功夫，應該唔難。裁判雞聲一响，雙腳一彈，即刻插入水中，雙手好似裝咗摩打不停撥水，對腳亦摶命踢，每次吸氣都睇唔到水面情況，因為太快太多水花，一路撥咗幾十下水，開始氣力不繼，照計應該差唔多到，打算一口氣完成，50米都支持唔住，當手腳開始無力時，望下水底條線，原來唔夠10米就到，可惜手同腳都已經遞唔起，最後一下都無力爬，只係順住水流浮到終點，望下兩邊，原來個個選手等緊我游完上水，為免妨礙其他人，縱然自己連呼吸都無力，氣都未回，亦忙記睇電算機成績，都要爬去池邊上水。 28 September 超越挑戰三項鐵人賽不經不覺進入第三個賽季，回望過去玩了長跑22個月，從幾k走到21k的半馬，10k由最初要52'過外，到現在只用40'xx就走完，看似進步好多，但走40'/10k的比賽是9個月前「元旦賽」的事，之後的比賽都未做過每公里4分鐘的時間，自問練習有增無減，但仍然無多大進步，或許已經到了個人極限，要再進步可能要等第二世，既然再繼續練都唔會有進步之下，自然對長跑開始心淡，比賽的意欲亦下降，為咗了結渣打第三部曲─全馬，來季都只係報了兩個半馬賽事，和一個處女賽情意結─「活力十公里賽」。 既然跑步無乜突破，就要另覓出路，加上雙膝開始出現問題，游水可能係唔錯嘅選擇，炎炎夏日走去參加三項訓練班，游水當然係主項，學完真係有進步，從只可以游一個塘就要回氣大休，到而家一口氣游10個8個塘都面不改容，仲可以跟人玩 program，見人玩兩項三項咁過癮，自己都報比賽玩埋一份， 睇下會唔會好似長跑有雞偷...人傻係咪特別天真？啱啱學識游水，單車都唔使操就話參加鐵人賽想偷雞！ 講返個處女三項賽，一早起身準備，去到賽場時間啱啱好，登記、租車、轉項區擺陣後放行李。第一次玩三項好新鮮，無點熱身，只係四圍參觀，見到跑友吹下水就夠鐘出發。落水當然讓人先，自己殿後，第一次公海500m，穩陣啲用蛙式，好在同組出發多數係女士，只有我踢人無人踼到自己，雖然無望後面，但知自己唔係最尾一個，轉入最後直路約百幾米，試下用自由式，出乎意料暢順，無話唔夠氣唔夠力，最奇嘅竟然係可以過人；上咗岸頭也不回直趨轉項區，抺腳著鞋，穿號碼布帶頭盔，一切順利，出到轉項區上車按錶，開始踩車，6個圈，一圈約4.5k， 之前自己練車踩機踩耷頭，勉強可以踩到每 10 min 5k，可惜無認真準備，組咗架 Mountain Bike，搏命踩咗一圈計數，10min半，踩完6圈咪超過63min！超出預算，唯有搏命踩，加埋雙手大力推，去到第4個 lap出事，屁股無力，唔肯出腳，上水時遲過自己踩車嘅同組師兄，已經快過自己一lap，踩唔到唯有落車推，細細個就識踩單車，經常片車，30年前已經踩單車由元朗踩出荃灣，幾年前仲踩單車派信，自問踩單車無難度，點知就係衰係單車度，本著放棄嘅心態慢慢踩，真係慢過行，踩埋兩圈返去轉項區，隔離左右嘅車都返晒嚟，下沉嘅心跌得更深，去到自己嘅強項跑步都無心機跑，加上踩車時用晒啲電，求其過咗幾件蛋散返終點算。 終於完成處女三項，睇下錶，1:47'51....呢次大鑊，好似唔啱數，邊有咁快，無估計錯，應該踩單車度出事，踩少個圈！無癮呀！！ 最新公佈時間係 1:47'54"，swim 15'08，bike 同 run 都無顯示，自己錶推算單車係 1:09'1x，跑步+轉項係 23'26。可能上水後轉單車按唔到錶計漏一圈，好彩當我完成啫。 16 August 2009南區越野賽玩埋今日個比賽，終於完成今季嘅賽事，其實上次玩完元朗8k時都諗住唞暑，但係因為種種原因關係，先至玩埋今日個南區越野賽至收手。而某種原因亦令自己今日有非攞獎不可嘅壓力，不過好在最近公司少嘢做，空閒時間較多，每星期都可以儲到50k以上，仲可以游埋水，但天氣較熱，所以較少練速度。曾經走過兩課速度，時間麻麻，捱唔到兩個就爆。 賽果﹕38'55。組別第五。 2009 Southern District Cross Country Run
14 June 元朗區青年節長跑賽不經不覺又到季尾，理應收操唞暑，但係好耐無走過8k，都唔知自己有幾多進步，所以報埋今日個元朗8k玩下，睇下可唔可以突破4'/k，就算天氣開始熱到30℃都繼續操，希望賽季完結前做個好成績，對自己有個交待。咁啱公司同事玩隊際又受埋自己玩，難得同高手同隊，興奮同壓力隨之而來，最近又因天雨影響操練，同埋驚自己表現失準，又驚打水戰影響發揮，成日發夢自己跑出咩嘢時間，又失眠....總之就坐唔安食唔落瞓唔著。 呢兩日有應酬，噚晚10點幾同人食完飯，即刻趕返屋企沖涼瞓教，好辛苦至瞓得著，點知半夜兩點行雷閃電，搞到醒咗瞓唔返，到再瞓入眼又到5點，夠鐘起身出發。搞完一大輪會合埋同事，做過簡單熱身就上線等起跑，唔知係咪太耐無比賽，定同高手一齊，以為自己都係高手，一起步就衝，完全無留力同無掌握比賽節奏，一味跟住第一集團走，諗住錶都唔使睇死跟實無衰，跑完兩k先識驚，都未收油自己都開慢車，有力但係無氣，點算？能唔能夠完成到賽事都成問題，過咗3k開始有人過頭，一個...兩個....去到 4k U-turn位都數唔到被幾多個人介。隊際計算三個人成績，自己應該第三個，無理由上岸放棄，連累啲高手同事無獎攞。過去嘅手下敗將一一爬頭，連低一班嘅跑手都快過自己，但真係無貨賣，唯有死捱，捱咗好耐好耐先見到終點，又走咗好耐好耐至跑完，望下錶，my god！34'30！平時自己練習都唔使咁嘅時間，失敗！徹底失敗！唔怪得咁多手下敗將今日跑贏自己，連自己都跑輸比自己，同上次 Nike 同一條路，開始、過程同結果都一樣....失敗。結果組別應該第十四五度，好在保得住隊際第二，算係對得住同事，但就咁帶住遺憾嚟結束今季賽事，似乎對心理同生理都有不良影響，睇嚟要在暑假加場來挽回多少信心，希望今賽能夠出現一個原整嘅句號。 雖然決定今季加場，但今日嘅賽事點都要檢討一下，希望將來「不愉快事件」唔會再發生。總結今次比賽，每周走40k以上，速度課亦都為持每周一課，哩數同狀態應該足夠，問題係出於心理質數同臨場跑法：心理上有太大壓力，無充足睡眠，對自己實力無充分掌握，有不切實際嘅冀望。跑法方面，無做好熱身拉筋指定動作，明知自己係後上馬，錯誤用放頭跑戰術，頭一公里走3'36就注定失敗收場；跟錯目標人物，以現時質素同狀態，應該用4'0X開圏，或者搵班手下敗將做電兔。跑完再向高手偷師，原來做高手要付出好多，要勤力外，基本速度亦要恆常練習，其中一個冠軍高手每早4點起牀練跑，晚上8點就上牀瞓，冠軍真係唔易做，睇嚟要擠身高手行列，達到自己目標，非要放多三兩年時間不可。
12 April 第三屆十公里復活跑失望，今日可能是自己今季最後一場賽事，所以穿40'大關的全部希望就寄託今天，可惜又一次衝擊失敗，賽後檢討，只得兩個可能，一是練習不得其法或不足，另一可能是料子有限，到達行人止步；如果是前者，要怎樣改善呢？加入跑會，跟教練？跟操又是否可以提升速度突破自己呢？如果是自己資質所限，「行人止步」的話，自己應否為不切實際的40'大關再存幻想，繼續守候呢？而明年的全馬計畫應該煞停還是照樣去馬？ 站在十字路口徘徊，「選擇」往往令人蹉跎歲月，浪費光陰，跑步比賽就只得一條賽道，每名跑手都沿著前人踏過的足印向前，這是理所當然，人生的賽道亦然，沿住前人走過的路線，保證平淡安穩，終點在望，何必另闢小徑，冒險行事，「選擇」只屬於「青春」。 今季最後一場賽事，比過去任何一場比賽有更大壓力，一個是自己要求，10k穿40'是每個跑手的里程碑，穿40'即代表進入另一個層次，可以考慮再闖另一關 ；自己徘徊40邊沿已經半個賽季，打算今場來過了段，壓力當然大。另一個壓力是對手，自己出道年多，過去賽事從未贏過C，而L就經常輸給自己，最近自己很少參加比賽，但近期比賽成績就是 L贏C，今場同時出現，究竟鹿死誰手？雖然今日未有超級高手，但同水平的對手都有大約七八個，想上台領獎，真是要穿40'才行。 去年第一次玩這個賽事，好舒服咁走出上季最佳時間：45'06，今日如何呢？今日天氣一般，自己接受，其他人就話熱，影響發揮；按照計畫，提早起身出門，到達沙田運動場，時間充裕做足熱身提早上線，企到較前位置，起步暢順，可以跟大隊前進，但速度就稍快，未夠2K已經過了C同目標偶像，還可以望到幾個高手燈尾，過了獅子橋勉強保持住速度，到對面單車徑3K後開始無力，太約4K頂唔住，被人魚肉，毫無還擊之力，跑姿失控，呼吸無節奏，目標偶像在此過頭，打算坐順風車，但頂到雙橋後又失控，究竟要提腿還是減低步長都唔知，就連呼吸都控制唔到，時深時淺，完全發揮唔到平時練習水準，7k後仍然見到目標偶像在50米外，我諗佢都無貨賣，下季唔會再輸畀你。頭3k自己介人，4-6k被人介，6k後就保持位置不變直到終點。頭5k用19'51，後5k就20'43，如果頭半程留力，後半程會否好過點？掹車邊攞到組別第九，40'33都有獎，有點慚愧。
22 March 香港長跑會第33屆香港畢拿山15公里越野長跑賽2009同對上一次西貢比賽相隔足足一個月，大家都係15k，話明越野賽，當然比上次挑戰賽難食，大上大落一早預咗，所以最近走多咗城門水塘車路，以為有幫助，又因為15k關係，今週唔夠里數，前日夜麻麻都加多餐飯後甜品，但睇返甜品時間，6k要28'幾，睇嚟今日比賽唔係咁樂觀。 季尾太少比賽關係，每個月只集中一場，所以對比賽成績都抱頗大期望，無形中攪到自己有壓力，影響腸胃，最近搞到個肚有少少唔舒服添，真係驚比賽時人有三急就幣；同埋山長水遠晨咁早去黃泥涌跑，又要自己搭車走，真係有少少唔願去，噚晚諗都唔諗今日個比賽，又無較鬧鐘，但願唔知醒唔使去比賽。但邊有咁多心想事成，啱啱5點就自己醒，唯有順其然，聽天由命。 去到比賽場地都唔知邊道報到邊道放行李，起點係邊又唔知，就連邊個係工作人員都唔知，想問都無得問，好在有啲地方唔使問都知喺邊，排晒長龍都要排，根據最近記錄，真係驚比賽途中出事，跟住做簡單熱身就等開跑。 一起步係上斜，個個都搶住去，好在自己企到較前關係，可以搵到個sub3高手跟，佢又唔係太快，上完山落大潭水塘，斜落當然順勢衝，2k已經過佢，從大潭上畢架山道就死火，諗都無諗過咁長，最後都要行，仲諗住自己上斜比人強添，跑完返去真係要好好檢討好好練上斜至得。行當然比跑慢，之先衝落斜過嘅人開始爬返自己頭，真無癮，5k幾上完斜，見有水站飲兩啖水就轉入山路，大家距離拉開咗，又加上山徑多灣，見唔到後邊有對手跟無咁大壓力，一路跟住一個鬼佬都唔過，跟人好過被人跟，不過尾段暗斜，開始爆，好在9k幾出返馬路落少少斜，有另一個水站濕濕口就算，跑到13k幾又要入山路，仲要係上梯級添，嚟到喱度開始有力不從心嘅感覺，明明對手响不遠處都追唔到，平路都加唔到速，好不容易至捱到返終點，時間係1:09'38，攞紀念品時見到兩個前輩跑完返嚟，估唔到可以跑贏佢兩個，可能佢地企得後起步都未定。跟住攞行李換衫等結果，行嚟行去都唔知邊度睇成績，今日天氣唔係咁好跑，又濕又熱又少水站，我件背心可以扭出成樽水，照計組別10名內，5名先有獎，等唔等好呢？最後都係放棄，如果有先打電話去問大會可唔可以補領，不過都係打定輸數。 企前排起步真係好有用；擺手無力，要加練手瓜至得；上斜步幅大，雖然過人過得快，但同時謝得快；唔夠瞓無狀態，有心無力；少練tempo，控制唔到均速，每週一定練speed+tempo+LSD至可以應付賽事。
22 February 西貢區長跑比賽 2008/09跑完渣打之後埋單計數，發覺以而家嘅速度，全馬根本做唔到 sub3，求其3:15食晒又好似無咩難度，對自己又無乜意義，2:5x又做唔到，真係進退兩難，比賽又辛苦，練跑又嘥時間，練來練去都無乜進步，不如就咁算，打算放棄唔玩，所以跑完渣打都無再報比賽，今日個西貢長跑都係渣打前報落，跑完今日先決定再唔再玩比賽。 今日臨時要開工，不過時間上無衝突，所以揸埋架車去比賽，點知北潭涌無位泊車，搵嚟搵去最後泊去大網仔，之後搭車入北潭涌，再跑上去六角亭當熱身，去到人地都準備開跑，除咗條褲連埋個袋交俾工作人員就埋位出發，隻錶又趕唔切定位，不過時間對自己唔再重要，可以完成唔辛苦就算。 頭1k經過廁所想話去解決，點知要排隊，想話揸流灘蛇下都唔得，繼續上路，一路從後追上，加上有斜路幫助，頭兩k都過咗好多人，去到 5k 位前，即 10k 組折回點，見到幾個同自己級數嘅跑手回程，一路數，自己太約排十幾位，如果跑10k肯定攞獎，唔知同自己一樣跑15.5k嘅跑手有幾多人响前面呢？過咗5k位即刻無晒人，前邊最近一個都距離百零米，仲有幾多跑15.5k嘅跑手都唔知，期間上上落落，而落斜比較多，走得都幾順，但始終接近唔到前邊個跑手，仲有幾百米到東霸折回點，有人開始回程，第一集團4個都係 sub3 高手，一路數，到自己太約第十個，自己同前後對手嘅距離都相差好遠，無人拍住跑雖然慢啲，但跑得好舒服，過咗頭5k之後都無再爬過人，亦都無被人介，好似得自己練習咁，不過狀態幾好，完全無以前捱嘅感覺，返到終點 1:05:27(32'51+32'36)，仲快過上次 kappa 15k挑戰賽。今日15.5k挑戰組第8，有個獎牌仔，無太大期望之下跑得唔錯。
08 February 2009渣打馬拉松(下)凡事都有第一次，去年第一次玩渣打10k，今日就第一次玩渣打半馬，亦第一次知道咩嘢叫做爆。 為咗好好享受同發揮，專登攞咗幾日假預備渣打，習慣下早睡早起，同控制飲食，費事唔夠睏無精神，同埋個肚唔生性，响唔適合嘅時間同地點出事，所以今朝可以在指定時間起床，煮咗麵食後咪咪磨磨先出門口，再去老麥食早餐慢慢辦大事；行去搭地鐵出尖咀，時間雖然趕，但一切都好順利，指定動作，換衫寄行李熱身，本應時間啱啱好，可惜最後衰响隻 GPS 手錶度，熱身前已經開錶定位，點知做完熱身都末得，行去太空館較空曠嘅地方以為容易定位，點知都係失敗，最後放棄，好在早有準備，有另一隻普通計時錶。 因為遲上線，又要企隊尾，望去起點，相距成七八十米。鎗聲一向，剩係行去紅地毯計時器都接近2分鐘，第1k行咗6分幾鐘，1:28肯定無望，寄望保住1:30，一路左穿右插，逢人過人，其間見到幾個熟口熟面嘅跑手，我咁從後殺上係咪好英呢？不過唔理，希望搵到目標人物搭順風車，跑咗2k先走出重圍，去到4k幾見到目標偶像响對面，相距都有兩公里。 條3號幹線真係幾好跑，又闊又大又長，水站又充足，不過頭2k真係嘥咗唔少時間，去到奧運站10k用咗成44'，雖然條路好跑，但都唔敢踩油，因為搵唔到目標人物跟外，仲有一半路程要走，所以保持住最舒服步速順住走算，去到九龍站，見到西隧入口，心情突然好興奮，因為難得今次係跑過去，而唔係揸車過，加上唔使俾隧道費添，所以落斜時都大踏步咁衝，順便回氣，跑完大約2k出隧道，傳說渣馬最難捱嘅路段就係西隧出口，咁有挑戰性最啱我，等我好好享受下，一條氣走上去過咗幾個，仲見到目標偶像燈尾，估唔到最後都追到佢，上到路面打過招呼就過佢，再望前邊又有另外兩個跑網師兄同鬼妹，仲有幾 k，終點前肯定過到佢地，落中環條隧道仔就過其中一個同鬼妹。正當自己仲有氣有力，諗住趕1:30嘅個時候，個雞心氣門開始痛，當時正上夏愨道天橋，衝落斜再慢走一陣都無明顯改善，唯有停一陣再行幾步，之前爬咗頭嘅跑手開始一個一個過翻自己，被人過已經好難受，而家仲要被咁多人過。 過咗添馬艦轉入灣仔海傍水站時，成個人企响度飲水，順便攞海綿抺眼淚，仲有3k唔夠都玩唔晒？之前一直跑公路，搵個觀眾都無，去到呢度開始見到好多人，個個都嗌加油，聽到咁多人叫自己加油，淚水同汗水都未抺乾就繼續上路，唔知佢地見唔見到我喊呢？耷低頭慢慢走，心諗死都要死返終點，去到灣仔球場上馬師道天橋已經無咁痛，走到入銅鑼灣市中心，兩邊都係觀眾，氣紛真係好好，謝晒嘅鬥志又被燃起，唔知係氣門唔再痛，定係自己忘記自己仲有痛，一直向著終點跑，過終點大會時間係1:32'55，最後一k都唔使4分鐘，都唔知開心定失望。。。。 最後更新，估唔到田總今次咁快，晶片時間:1:31:04，組別第21，如果唔係遲上綫，如果唔係咁多人，如果唔係心口痛…
2009渣打馬拉松(上)一年一度嘅渣打又嚟，相比起去年第一次玩渣打，今次明顯有備而戰，雖然唔係咩嘢訓練計畫，但快課長課，均速跑，連水療都做埋，可以話要做嘅都做咗，而家只係等一陣比賽時嘅發揮。但始終都係新手，又無專業教練同跑會十卜，自己究竟有幾多料，可以跑到乜嘢時間，完全掌握唔到，唯有靠往績段估，不過自己好少跑咁長，只有兩次咁大把，對上一次跑半馬係聯合國兒童基金會，時間係 1:30'，事隔兩個月，進步肯定有，但有幾多？一分鐘兩分鐘，定係一秒兩秒呢？始終欠缺信心，所以大賽前都唔休息，模擬半夜起身去比賽，晨早偷跳一課速度，睇下自己可唔可以做到每k4分鐘，結果跑咗3k就爆咗，睇嚟穿1:28'嘅機會唔係咁樂觀，兩分鐘真係咁難？點解又要1:28'呢？因為翻查舊年渣打成績，自己組別第10名嘅時間係1:29'，所以要打入十大，保守估計，要做到1:28'先得。 當今日嘅半馬未開跑時，已經為下一屆全馬準備，四圍睇人地今年點練全馬，個個 sub3 嘅高手每週都練超過百一二k，真係難以置信，一星期7日，平均每日走十幾k，自己每日坐車返工放工，去埋街都坐唔到咁多嘅里數，要好認真諗諗，點樣安排時間去食出年呢隻，人生第一個全馬。 不知在那裡聽過，「跑馬拉松，就如接受人生路上每個挑戰…」，人生有時頗無聊，完成一個目標又定下另一個新目標，好像無休止的追求下去，最要命的是，每個新目標都比剛完成的目標更困難，更俱挑戰，而更諷刺的，就是這些目標與理想，都是自己找回來，根本就是自尋煩惱；好好的，平平淡淡的，安安穩穩地，去走完一段人生路不是很好嗎？何必要自找麻煩，自討苦吃，向難度挑戰呢？ 挑戰？理想？說得多偉大，我呸！說穿了，這不過是每個人內心深處的自虐心理作祟，要在痛苦中找尋快樂，再在快樂中找尋高潮，在鬱悶中尋求慰藉，無休止的沉溺下去，直至臨終前，垂死掙扎的剎那間，所得到的最後一點快感…… 01 February 深水埗區越野賽2008/09恭喜發財，牛年第一個賽事就喺主場舉行，$20，諗住渣打前搵件平平地+近近地+短短地容易食，遇賽於操，但表面易食嘅，往往係危機四伏。
因為過年關係，停操兩日，為咗儲里數，呢兩日都加操，諗住今日咁短，就算半力都搞掂，又以為今次又好似上次葵青一樣得咁少人，唔使搏都有獎攞，點知打錯算盤，自己組都有成卅幾人，仲見有幾個高手添，上次跑第二嘅手下敗將有出現，另外又見自稱斜路王嘅跑手同組，自己第一次跑都唔知自己有幾多貨，因為自己一向做事認真，為咗嚟個賽事專登買對越野鞋，加埋噚日都試走呢段路兩次，照計自己都會係前列分子，幾有信心，所以咁近行上水塘都帶背囊，諗住用嚟袋獎杯。 主辦單位話9點前集合，又無講幾點跑，未夠9點上到去，先知10點先開跑，戇居居等成粒鐘，熱身都熱咗幾次，好不容易至等到開跑，一起步，有無搞錯，個個好似餓鬼咁搶住去，唔好執輸，自己都衝埋一份，去到上斜先收油，但前邊都有大約10個人，今次死火，分分鐘十名都不入，而早兩日走咗兩課都係高強度，今日腳軟外，對手都無晒力，完全遞唔起，上次跑第二嘅手下敗將同上次一樣帶頭領放，上完第一個斜路落山時，唔理咁多踩油去，希望去到第二個上斜時過返幾件，到越野徑時可以比較容易走，其間從後又走多兩件過頭，早知起步時唔跟住衝留力啦，跑到k半唔夠，都未到草山第二個上斜位就左轉入小徑，想話趁上大斜路過人嘅計畫告吹，今次無仇報添，轉落小徑時趁機過咗兩個，包括個斜路王跑手，而上次跑第二嘅手下敗將都被幾個人爬咗頭，但同自己仍保持二三十米距離，响小徑走咗幾百米又跌watt，睇住個手下敗將越走越遠，唉！如果後邊唔係有人追真係想行，其實比賽最辛苦唔係去跑贏人，係被人追時，夾硬迫自己跑，4k唔夠都走得咁辛苦，下星期渣半馬點算？走完越野徑出返主霸直路，只可以用個「捱」字形容，睇住兩個年青人過自己頭直衝終點，步步有勁真係羨慕，4.7k唔夠，用20'39，唔算慢但好辛苦，走入第7有優異獎，逢賽有獎好彩保得住。
18 January 先進運動會 2008/9無驚無險，予取予攜.。今日玩先進運動會，舊年 32'01，今年希望可以 under 28'，睇去年成績，28' 內應該可以攞獎，不過有無獎唔係咁緊要，最緊要係做到好時間，每 k4' 係自己嘅標準要求。而這個並唔係自己嘅目標賽事，加上前日走咗廿ｋ都未回到， 固只係當場快課保持狀態，跟住自己嘅自制時間表操練，賽後加送 4k 用嚟儲里數。 今朝刻意遲到，趕到去大尾督啱啱有人上線等起跑，換衫寄行李做簡單熱身後，再行去起點就開跑。雖然唔係太多人，但為免被阻所以一起步就加速，衝咗大半 k 見到有目標人物，即刻收步搭順風車，個目標人物往績係 27' 頭，跟到佢就達標，走落發覺唔夠力走唔起，好在早收慢，去到 3k 上斜位都可以 keep 住速度無大跌，折返點前數下人頭，第十名，回程落斜唔集中精神，剩係回氣無加速，就咁被兩個人過，目標人物已經跟唔住，最後 2k 大直路，好辛苦至過返件，另一個喺前面唔夠 40米，一直咁追都差些少，而後邊又傳嚟好大嘅呼吸聲，好似叫春咁，越嚟越近，自己又無油，前面追唔到，後面又有人追，保持住咁嘅形勢走咗 k 幾直到終點都無變，真係辛苦，但幾過癮，自己追着一個目標嘅同時，自己亦成為其他人嘅目標。 講返結果，27'33 走咗 6.83k，全場第九，組別走入第三，今年逢賽都有獎可以繼續保持。
04 January 2009葵青區越野賽真係銳不可當，今季翻卓第二次嘅賽事全部報捷，12月黃大仙飛鵝山，1月1沙田元旦賽，加埋今日葵青越野賽，去年第一次玩，成績只係一般，經過足一年嘅練習，就可以攞到兩個組別第一，一個第五，另外今年無報嘅賽事其實都有好大幾會攞牌，包括離島區長跑(因為有個在早兩日元旦賽嘅手下敗將都走入第4)，屯門區長跑(因為上樓梯同上斜，係我強項，睇今日就知)，仲有2月嘅馬鞍山8k(因為9月歡樂跑時跑第14，今次將杯有12個，企前啲起步起碼跑贏幾個)，對自己再做好時間，再有進步嘅信心大增。
記得去年暑假時，10k走45'停留好耐，以為自己年紀大，行人止步添，估唔到今日連10k穿40'嘅大關都被我做到，對於穿39'，38'都覺得唔係太難，因為每100m都係走多一兩秒，每k都係十秒八秒之間，用一季嘅時間認真練跑，穿38'指日可待，自己對跑步嘅最後一個目標都唔怕話俾人知，就係要3小時內跑畢全馬，攞田總$1000。 講返今日，雖然天氣比舊年好咗，但參加者反而少咗，跑10k嘅壯年先進同元老組加埋都唔夠跑4.5k嘅青年組多，元老組參加者有7個，壯年同先進分別都係9個，而每組都設有10個獎，個個參加者都可以上台領獎拍照，踏入09年真係皆大歡喜。元老組起跑完到我地先進，上線時數下人頭，9個！唔使爭，唔使搏，點知一起步個個都衝，都唔知搏乜，而我就留住第5位，第一個上斜已經進佔第三，第二個上斜頭又爬多一級，跑第一位果個好似好超班，帶離好遠，我當然唔追佢，守住第二都好滿足，不過轉入上針山路口大斜佢居然行喎，我都無急，慢跑過佢頭，其間較後起步嘅壯年組有三隻快馬相繼爬頭，好在大家唔同組 ，去到鉛礦坳路口16'(3.7k)，跟住落斜過咗歷奇公園回程，約21'(4.7k)，見到第二位嘅高手遲唔夠1分鐘，再返鉛礦坳大上斜，頂唔順要行幾步，路口位25'(5.8k)，返到針山路口前上斜位爆偈，嘔咗幾嘢繼續，落完斜入主霸平路，腳腳有力，狀態大勇，軍冠在望，垂手收鞭，用咗 43:13攞組別第一。
01 January 第二屆沙田元旦長跑新年快樂！新的一年新的開始....係攞獎的新開始。睇翻去年初出道時都有跑過嚟個賽事，08年1月1日，自己第三次跑比賽，上次時間係 48'，今年會係幾多呢？
自上次玩飛鵝山之後，腳底筋膜發炎，痛咗幾日，影響咗練習，加上渣打前都無較長距離嘅賽事，所以無乜操長課，不過就抽時間玩速度，雖然幾辛苦，但原來好見效。話就話唔使練太長距離，但基本哩數都要夠數至得，喱幾個星期每周都係得三十零 k，12月操得 15 日 170k，為咗儲哩數，今日雖然有比賽，噚晚都偷跳一課慢 jog，最尾 1k落鞭推騎，居然可以 under 4' 而毫不費力，今日個 10k 大有信心可以 pb，發揮得好應該唔使 41'。再翻查去年呢個賽事成績，自己組別 42 分鐘樓下可以攞獎，所以噚晚好早瞓，今朝一早起身梳洗，剃埋鬚，蜡靚個頭準備領獎。
因為太滋油，加上習慣去幾次廁所，張啲毒素有咁清排咁清，去到沙田運動場都成 7 點 8，加上天氣又凍，禽禽青做熱身，走多兩個圈走興個身就早啲埋位，企前啲打算做好成績。呢期無咩高手到場，一開始好暢順，出咗運動場除咗個非洲跑手外，仲可以見到第一疊嘅跑手，今次亦唔敢望錶，求期搵個人跟就算，50m 外見到偶像目標人物，睇往績肯定唔夠佢跑，望到佢尾燈都好難得，企前啲起跑真係好，啲 pacer 好啱走，無驚無險去到 u-tune 位，望下錶，19'幾，估唔到時間咁靚，保持速度 sub 40'有望，繼續沉着應戰，不經不覺跟住目標偶像，跟到佢仲加無死，但點解佢會俾我跟到嘅？好似唔對路，果然去到大約 6k½ 佢上岸，唯有自己走，步速即刻慢晒，前面 80m 有另一個曾經係目標人物嘅手下敗將，跟咗佢一公里就爬佢頭，走到最後 1k 望下錶，啱啱 36'，sub four 好敏水，自己又無油，入到運動場想話踩油加速，即刻爆偈，捱到去終點線都被人介一嘢，按錶睇，40'01，pb！net time 肯定唔使 40'，擇過好日再衝擊 40分。
29 December 最 寂 寞 的 一 公 里長 跑 從 來 是 個 寂 寞 的 活 動 。 除 了 那 些 非 洲 、 日 本 來 的 精 英 跑 手 外 ， 其 他 跑 手 基 本 上 只 是 自 己 跟 自 己 比 賽 ， 沒 有 甚 麼 競 爭 的 味 道 ， 只 有 一 個 人 不 斷 在 跑 ， 只 有 一 個 人 跟 溜 走 的 分 秒 比 賽 ， 看 看 自 己 比 上 次 比 賽 快 一 點 還 是 慢 一 點 。
只 是 ， 跑 的 時 候 還 不 是 最 寂 寞 的 時 候 ， 因 為 總 會 有 少 數 幾 個 其 他 跑 手 在 附 近 ， 有 的 準 備 「 過 你 頭 」 ， 有 的 則 會 逐 漸 被 你 拋 離 。 換 句 話 說 ， 你 總 是 在 人 群 中 ， 你 總 會 感 到 是 跟 他 一 起 完 成 某 個 旅 程 。 真 正 的 寂 寞 從 跑 到 終 點 開 始 。 到 終 點 後 ， 你 過 去 一 段 時 間 的 訓 練 告 一 段 落 ， 你 完 成 了 賽 事 ， 達 到 了 目 標 ， 暫 時 再 沒 有 新 的 目 標 。 剩 下 的 是 一 個 人 蹣 跚 的 從 終 點 走 回 儲 存 行 李 的 地 方 ， 領 回 行 李 ， 換 過 乾 爽 清 潔 的 衣 服 ， 再 一 個 人 坐 車 回 家 。 前 幾 個 月 在 挪 威 參 加 日 不 落 馬 拉 松 時 這 份 孤 獨 感 不 算 強 烈 ， 也 許 是 因 為 整 個 旅 程 都 是 一 個 人 ， 也 許 是 因 為 從 終 點 走 幾 步 就 回 到 酒 店 ， 來 不 及 傷 春 悲 秋 一 番 。 上 星 期 日 在 西 貢 參 加 十 五 公 里 挑 戰 賽 後 那 份 一 個 人 在 途 上 的 感 覺 卻 特 別 強 。 從 終 點 走 回 擺 放 行 李 的 地 方 足 足 有 一 公 里 遠 。 陪 着 我 走 這 一 公 里 的 只 有 一 支 蒸 溜 水 。 其 他 大 部 份 參 加 者 要 不 是 三 三 兩 兩 一 起 走 ， 就 是 有 家 人 、 朋 友 在 終 點 迎 接 他 們 ， 為 他 們 拍 照 ， 為 他 們 送 上 風 衣 ， 為 他 們 送 上 熱 飲 ， 然 後 再 陪 他 們 走 這 一 公 里 路 ， 聽 聽 他 們 談 跑 步 途 中 的 高 低 起 伏 ， 聽 聽 他 們 說 那 一 段 路 最 難 啃 ， 那 一 段 路 最 舒 服 。 獨 個 兒 走 着 這 一 公 里 路 時 ， 也 有 想 跟 誰 說 說 話 ： 「 投 訴 」 那 段 八 百 米 的 長 命 斜 如 何 攞 命 ， 如 何 令 我 舉 步 維 艱 ； 分 享 一 下 跑 過 水 壩 時 看 到 的 群 山 倒 影 如 何 明 淨 亮 麗 ； 講 一 講 新 置 的 28 號 跑 鞋 如 何 令 自 己 打 破 個 人 最 佳 成 績 … … 。 可 惜 ， 那 一 刻 身 邊 只 有 Watsons ， 就 像 電 影 《 Cast Away 》 （ 劫 後 重 生 ） 的 湯 漢 斯 只 有 Wilson 作 伴 一 樣 。 雖 然 有 點 寂 寞 ， 總 不 能 像 湯 漢 斯 那 樣 對 着 水 樽 說 「 Watsons ， 你 知 唔 知 我 跑 得 快 過 四 年 前 呀 ！ 」 吧 。 下 次 長 跑 也 許 不 該 再 扮 lone wolf ， 該 找 個 人 來 為 自 己 打 打 氣 ， 免 我 真 的 要 跟 「 屈 臣 氏 」 說 話 ！  摘自2008年12月27日「蘋果日報」 21 December 香港 15 公里挑戰賽 2008世上沒有免費午餐，早前取了人生第一個長跑冠軍，看似輕而易舉，但有誰知道我負出了不少代價。當日跑完即刻腳痛，休息了兩日打算慢跑復操，誰知腳底痛楚加劇，第二日再開慢車試跑，都係唔掂，大賽在即(今日)，想盡辦法，熱敷冰敷、查油按摩、電療....務求以最快速度痊癒，因為食髓知味，接下來嘅賽事如果發揮得好，分分鐘又可以衝擊獎牌 ，可惜今日仍然未好，唯有定出三個解決方案，一係放棄，專心養傷；一係按照一早定落目標，唔理傷痛，繼續爭取好成績；最後一個，就係 hea 住跑，目標係完成就算，但以自己性格，邊會。 今日戰線在西頁，明明在東邊，點解叫做西？8時開跑，大會有專車接送，6:15 沙田排頭路，去沙田頭班巴士開 5:40，都唔知趕唔趕得切，趕唔切未必唔係一件好事，可以有藉口養傷，不過最後都搭到車，仲好早去到比賽場地添，戇居居等成粒鐘至話開跑。响車上一路計算自己做咩 pacing 去跑呢，暫定頭 5k 用 4'25，中間 5k 用 4'15，最後 5k 如果有貨賣就走 4'10 樓下，1:05 都唔使，好理想....你就想！根據以往操練，自己真係可以用 1 小時 04 完成，而賽事過往成績，自己組別就可能在 10 名左右，但未走過嚟條路，聽講好多上落斜，加上自己得八成功力又操得少，結果....達到最低要求─1小時 06。 之前幾個目標人物都變咗手下敗將，所以搵咗另一批目標人物，今仗都有好多蒲頭，自己仲泊住幾件一齊等起步添，因為時間充裕，所以一早埋位等，仲可以企响較前嘅自己時區，企慣咗較後嘅悠閒區，大賽企咁前都係第一次，班跑手水平真係另舍不同，一出閘個個都好似老虎咁，連女士都唔例外，真係跑慢啲都驚阻住人，跑咗唔夠一k就要上斜，雖然自己上斜唔算弱，但以往上斜逢人過人情境已經不再，成班都係有經驗跑手，自己好勉強至跟到佢地，如果有態應該可以跟到。不過真係好多斜路，跑到唔夠 5k 腳底就有反應，過咗回程約 9k，左小腿又想賣老抽，10k 時間約 44'，一路上上落落，就好似人生咁，曾經有幾次想放棄，但大海茫茫，加上腳痛，上咗岸都唔知行到幾耐至返到終點，唯有繼續就住跑，希望早啲完成，可以返屋企唞；可能經驗少，見有幾個目標人物就亂跟，一早定落嘅 pacing 完全無照做，又驚有壓力，所以唔敢睇錶，無壓力又點會有進步呢？因為就住跑，可以留番少少力，諗住返終點前有段落斜可以發力衝返去，點知賽會將終點移前咗成 k，都未發力就到終點，突然而來嘅終點真係有點不知所措，大會時間又無睇，期實跑步好沉悶架，點解自己跑之前定落要做嘅嘢一樣都無做到嘅？係太集中精神，忘我地跑，定精神散漫，發住夢跑呢。
07 December 黃大仙區飛鵝山長跑2008出賽一週年暨第一次棒杯。其實未跑之前對自己充滿信心，只係未知對手實力同紀錄時間係幾多，連自己會跑咩時間都唔知，剩係知自己可以唔使行一路跑上山，肯定快過舊年好多，一如所料，快過去年 9 分幾。最近都無為咗喱場賽事作針對性練習，因為平時跑上城門都已經夠，跑落斜又唔使點練，因為第一次玩飛鵞山時，落山快到無論，拉都拉唔住，又因落斜好傷腳，所以一直都無練落斜路。 雖然喱場只係雞賽，但自知奪獎機會頗大，所以賽前都幾緊張，成晚發夢跑步，跑到抽筋，真係抽筋抽到醒。今朝一如以往咁做完指定動作搭埋車去到斧山運動場，時間充裕，加多幾錢肉緊，做多幾次熱身，去到賽場都唔停，繼續打圈，成年組同青年組出發後就輪到我地先進組，32人，搵咗兩個目標人物，一起步，唔使爭，守住第一疊四五位，經過上次田徑賽有頭無尾衝爆嘅經驗，今次幾大都唔帶頭，用自己平時上水塘速度慢慢上，過咗1k守住第三位，雖然第一位去到三四十米外，但都無動搖賽前部署，跟到落山就可以攞獎，不過跑完2k頭兩位都好似無乜貨賣，好容易就過咗佢地頭，第一次做領航員，唔敢太快，一步一步走上山，上山過咗好多之前出發嘅成年同青年組，到落山前灣位水站，望上去見唔到有同組跑手，可以企响度慢慢飲水都得，跟住跑落斜就俯衝而下，好似被人追債咁，跑咗1k好似大局以定，所以都無搏命衝，去到終點 32:32，第 17 個過終點，都唔信自己跑到分組第一，等成績出咗先信係事實。
|
|
|
