真係深水起步，起點離碼頭都十幾廿米，想話企响岸邊等開始都唔得，一開始想話照計畫用自由式游足全程，但左右隔離都用蛙式游，為咗保護自己，都要用蛙式游住先，到有空位時又用番自由式游，本應都幾好，因為原本可以過人，可惜自己唔係快，又唔敢博，話晒大海茫茫咁危險，明明過咗對手半個身，但被對手踢兩嘢又要用番蛙式，如是者自蛙輪流用，啲快馬一早上水，自己仲响水中掙扎，上咗水都唔敢望返轉頭，因為唔想知自己係咪最後一個上水，睇下時間，19'XX，預算3'/100m，即係快咗。

離開水面當堂唔同，水上就捱打，陸上就要主動些少，未跑到轉項區都過咗幾個人，戴好頭盔推住單車又過咗幾個，發覺其他人轉項好屎，我咁渣都可以响轉項區過咁多人，時間用咗4'05，上車時仲係跳上去添，跟住就咁搏命踩，其他人仲停低架車慢慢上，但威得唔夠一分鐘，後邊啲車手開始一個一個爬頭，不過好過上次，上次成群咁過，今次隔好耐先有一架過；上次踩車嘅陰影實在太大，真係好驚要落地推車，加上今次條車路有好多暗斜，沿途不停轉波，半奧只踩一個圈，都唔知18k定20k，比起上次「超越挑戰三項鐵人」，條路又長又闊，啲車無上次咁集中，又無人勾車，肉眼所見範圍都係得十零架車，有些少冷清嘅感覺，不過對我幾有利，因為無壓迫感，可以專心踩。踩到最後一公里，見到一齊出發嘅三項同學仔A响隔離跑步區跑緊，就到半程turning point添，真係強，去到落車區睇錶，40'21。

入到轉項區，放低所有嘢，戴帽同黑超就跑，1'50。踩完車再跑步，對腳硬係差多少，開唔到步，唯有密密腳細細步走，跑道上其他人仲慘，大步啲行都快過佢地，約2k位，見到上一組出發嘅另一個三項同學D响對面，佢就弱啲，睇下終點前可唔可以過佢，去到U-turn位掉頭10'57，對腳仲未適應，剩番唔夠2k終於見到三項同學D，對腳亦開始上力，打聲招呼就過佢，進入最後直路，終點前大空地，約500米開始加速，執咗好多件直趨終點，終點有人拉線，加多兩錢肉緊衝刺，衝完仲有工作人員幫你掛獎牌，唔知仲以為自己得獎添，大會真係攪嘢，總時間1:26'02。

玩完都唔得閒，沖身換衫，還車，交晶片，四圍攞嘢食攞嘢飲，又要同人social，不過真係幾好玩，尤其游水，估唔到750m都可以應付，遲下考慮玩渡海泳都好喎。

人的一生中，總曾試過選擇錯誤，或作出錯誤決定的時候，這次游泳比賽正是眾多錯誤決定其中之一，直至比賽前的一刻，甚至現在。

幾廿歲人從未正式學過游水，每次游水都有個主要原因，就係有傷，唔係手就係腳，肩周炎，筋膜炎，網球肘，拉傷肌肉等等，睇親醫生，個個異口同聲都叫游水，久而久之先識少少游，平時爬爬下游一個塘就休夠再爬，最近玩三項先叫做游密咗，又跟下人操水，咁啱有個游泳比賽，所以胆粗粗報個50m自由式玩下，算係測試自己時間。

話晒第一次玩泳賽，唔知有幾多對手，又唔知對手實力，自己知自己事，最緊要唔好包尾，就算係都唔好差太遠就得。二十蚊報名費，隨時放棄，比賽當日如常起牀，無安排節目，表面係應付這個泳賽，但完全無準備，包括生理同身理，睇埋電視食完早餐，仍然有大把時間，好不情願執埋游水用具出門，途中隨時改變主意都未定。去到青衣泳池睇咗幾組200m比賽就到自己果組召集，即刻換泳衣報到，做熱身等落水，都唔記得自己打算棄權唔玩添。坐响泳線前張凳度，專心一志盤算將要做的每一個動作；第一次企上泳線跳水，仲要俾咁多觀眾望住，好在自己集中精神，所以都唔識驚，手板眼見功夫，應該唔難。裁判雞聲一响，雙腳一彈，即刻插入水中，雙手好似裝咗摩打不停撥水，對腳亦摶命踢，每次吸氣都睇唔到水面情況，因為太快太多水花，一路撥咗幾十下水，開始氣力不繼，照計應該差唔多到，打算一口氣完成，50米都支持唔住，當手腳開始無力時，望下水底條線，原來唔夠10米就到，可惜手同腳都已經遞唔起，最後一下都無力爬，只係順住水流浮到終點，望下兩邊，原來個個選手等緊我游完上水，為免妨礙其他人，縱然自己連呼吸都無力，氣都未回，亦忙記睇電算機成績，都要爬去池邊上水。
完成比賽，即刻換衫出去無乜人嘅空曠地方攤屍回氣。接住去火炭操單車，6點前趕返嚟睇成績，44秒15，第4，第3時間係44"04，如果捱埋最後幾米應該....

不經不覺進入第三個賽季，回望過去玩了長跑22個月，從幾k走到21k的半馬，10k由最初要52'過外，到現在只用40'xx就走完，看似進步好多，但走40'/10k的比賽是9個月前「元旦賽」的事，之後的比賽都未做過每公里4分鐘的時間，自問練習有增無減，但仍然無多大進步，或許已經到了個人極限，要再進步可能要等第二世，既然再繼續練都唔會有進步之下，自然對長跑開始心淡，比賽的意欲亦下降，為咗了結渣打第三部曲─全馬，來季都只係報了兩個半馬賽事，和一個處女賽情意結─「活力十公里賽」。

既然跑步無乜突破，就要另覓出路，加上雙膝開始出現問題，游水可能係唔錯嘅選擇，炎炎夏日走去參加三項訓練班，游水當然係主項，學完真係有進步，從只可以游一個塘就要回氣大休，到而家一口氣游10個8個塘都面不改容，仲可以跟人玩 program，見人玩兩項三項咁過癮，自己都報比賽玩埋一份， 睇下會唔會好似長跑有雞偷...人傻係咪特別天真？啱啱學識游水，單車都唔使操就話參加鐵人賽想偷雞！

講返個處女三項賽，一早起身準備，去到賽場時間啱啱好，登記、租車、轉項區擺陣後放行李。第一次玩三項好新鮮，無點熱身，只係四圍參觀，見到跑友吹下水就夠鐘出發。落水當然讓人先，自己殿後，第一次公海500m，穩陣啲用蛙式，好在同組出發多數係女士，只有我踢人無人踼到自己，雖然無望後面，但知自己唔係最尾一個，轉入最後直路約百幾米，試下用自由式，出乎意料暢順，無話唔夠氣唔夠力，最奇嘅竟然係可以過人；上咗岸頭也不回直趨轉項區，抺腳著鞋，穿號碼布帶頭盔，一切順利，出到轉項區上車按錶，開始踩車，6個圈，一圈約4.5k， 之前自己練車踩機踩耷頭，勉強可以踩到每 10 min 5k，可惜無認真準備，組咗架 Mountain Bike，搏命踩咗一圈計數，10min半，踩完6圈咪超過63min！超出預算，唯有搏命踩，加埋雙手大力推，去到第4個 lap出事，屁股無力，唔肯出腳，上水時遲過自己踩車嘅同組師兄，已經快過自己一lap，踩唔到唯有落車推，細細個就識踩單車，經常片車，30年前已經踩單車由元朗踩出荃灣，幾年前仲踩單車派信，自問踩單車無難度，點知就係衰係單車度，本著放棄嘅心態慢慢踩，真係慢過行，踩埋兩圈返去轉項區，隔離左右嘅車都返晒嚟，下沉嘅心跌得更深，去到自己嘅強項跑步都無心機跑，加上踩車時用晒啲電，求其過咗幾件蛋散返終點算。

終於完成處女三項，睇下錶，1:47'51....呢次大鑊，好似唔啱數，邊有咁快，無估計錯，應該踩單車度出事，踩少個圈！無癮呀！！

最新公佈時間係 1:47'54"，swim 15'08，bike 同 run 都無顯示，自己錶推算單車係 1:09'1x，跑步+轉項係 23'26。可能上水後轉單車按唔到錶計漏一圈，好彩當我完成啫。

玩埋今日個比賽，終於完成今季嘅賽事，其實上次玩完元朗8k時都諗住唞暑，但係因為種種原因關係，先至玩埋今日個南區越野賽至收手。而某種原因亦令自己今日有非攞獎不可嘅壓力，不過好在最近公司少嘢做，空閒時間較多，每星期都可以儲到50k以上，仲可以游埋水，但天氣較熱，所以較少練速度。曾經走過兩課速度，時間麻麻，捱唔到兩個就爆。
講番今日個賽事，事前做晒資料搜集，知道每組只得5 個獎，34'30先有機會入圍，自己發揮水準勉強達標，好在撞啱中興杯同日比賽，絕大多數高手都去中興，自己變相少咗對手競爭，此消彼長之下，分分鐘可以偷雞，太耐無攞獎，希望標番個尾會收爐。
山長水遠去到香港仔，好在交通都算方便，唔使一粒鐘就到，現場地少人多，想話搵毎靚位做熱身都唔易，行行企企四圍望，見到幾個熟口熟面嘅跑友，雖然係手下敗將，但最近狀態麻麻，為免上次元朗事件再發生，所以都唔敢掉以輕心，係咁打圈，跟住爭取有利位置等起跑，出閘係上斜位，雞聲一响，唔係太多人鬥搶，自己可以留力慢慢上，斜路真係好蝦人，好在自己訓練有素，唔覺唔覺過咗好多個，1k吾夠就入山路，入咗去差唔多大局已定，全程介低幾件，又被幾個過，介人通常係上斜或落樓梯，被人過就多數响平路，唔使講都知係咩嘢原因，基本速度真係要練多啲至得。整條賽道都幾難跑，大多數係沙泥石路嘅小徑，而且上落梯級又多，自己都頂唔順行咗幾次，又從未行過呢條路，又唔敢睇錶，都唔知幾時至入直路，幾時快幾時留都唔知。因為今日一定要攞獎，所以直路前爆咗幾次都唔敢收慢，好不容易至捱到入直路，油都唔敢收，就咁衝落斜，睇下時間，同目標時間差好遠，不過探子回報，應該走入組別第三。因為淺水灣同時有水陸兩項比賽，三鐵班有幾個同學都有玩，所以結果都唔等，涼都唔沖就搭車去八下。最後電話來料，組別第五，好在掹車邊偷雞成功，標到個尾會收爐，對下季嘅賽事從新評估計畫過。
隻錶有問題，中途曾經接收唔到 GPS 訊號，導致距離有誤，加上林蔭小徑，同上落樓梯種種因素，未能提供分段時間，全程8K，時間：38'57。

賽果﹕38'55。組別第五。

2009 Southern District Cross Country Run