失敗開始...        ...注定....     ...失敗終結

每當比賽完畢，尤其消耗體力嘅長途賽，身體抵抗力就會減弱，好容易病倒，上次第一個半馬跑完，真係病咗成個禮拜，狀態長期徘徊谷底，操極都無力反彈，加上月初公司多嘢做，放工都差唔多天黑，無可能上水塘玩，其他運動場又多數開運動會，自己主場嘅球場又封咗，唯有入健身室跑機，順便做埋「尖」，加強肌力，希望提升速度。

今次第一次玩場地賽，主要係玩速度，希望為 NIKE 可以做到 「sub 4」做測試，亦為之後嘅半馬跑出 1:2X:XX 做準備；表面上好有規劃，其實因時制定，靈活變通，隨時睇環境睇時間操練，說穿了，即係隨機應變，無咩嘢計畫；所以今次都唔識點做針對性訓練，又無運動場可以做模擬測驗，剩係心想 under 20，即時速 4'/k 就收貨。今日天氣好適合跑步，但等咗成朝，12點9至落跑道，開始肚餓，個身又攤凍晒，賴定先。男子公開組，得八個人，個個都係學生乙組，得我係甲組，另外女子公開都係得兩名，如果分開甲乙組咪幾好，自己肯定得第一。

「on your mark...」，雞聲一响，不甘人後嘅天性又出現，即刻搶住去，雖然左右都有人一齊爭，但都俾我搶到個頭位，失敗就係由嚟度開始。霸到頭位就死去，好似練 interval 咁，頭 200m/35"，第一圈 1'20"，頭 1k 都唔使 3:30，自己都從未做過嘅時間，不過掛住衝都無睇錶，係事後睇番至知 ，跑咗三個圈自知死緊，諗住收慢回氣，即時被成班人過頭，跌到去最尾，雖然莫氣都咬住最後兩件走，照計七名對手無理由個個都跑贏我，自己唔似水皮得咁緊要，一於死跟，跟住人走完全唔同，有人頂風又可以留力，一早係咁就唔使咁辛苦，我地最後三個各有領先，一路都拍住一齊跑，但頭兩位跑手到第七八個圈已經跑多我地一個圈，第三位好似開始無力，距離我地百多米左右；自己一開始就好似遊雲咁，個腦一片空白，無睇錶，無計步速，亂咁呼吸，有幾多去幾多，跑到剩番幾多個圈都唔知，去到最後二百，同隔離跑手過咗跑第三位跑手頭，轉入直路，離遠見圈數牌係 「0」，隔離跑手開始發力，如果最後衝刺成功就可以攞到第三，我都唔執輸，一於鬥衝，奶力都出埋至衝贏，即刻企埋一邊嘔，但無幾耐，被我地爬頭跑第三位嘅跑手都來到終點，但仲繼續跑無停到，唔係呀？直覺話俾自己知，仲有一個圈未跑呀！一路猶疑緊，一路望住頭先一齊衝刺嘅跑手，大家都露出不能接受嘅迷茫眼神，跑道上仍然有人跑緊，自己跑唔跑好呢？究竟跑完未架？如果唔繼續即係未能完成喎！唉~~頭先衝完都無力再走，執嘢走人算...

衝擊獎牌失敗，未能完成賽事更失敗，最短距離最多檢討咪話唔失敗，跑完無拉筋無著衫就走人，聽日對腳實痛外，而家打乞啑都打都黐肺，拍咗幾粒藥都止唔到，一晚用咗一卷廁紙，聽日攞唔攞老 sick 好？ 睇番時間，同平時快課差唔多，但就辛苦好多，唉~~失敗仍然繼續，究竟失敗嘅終點在哪？

½400m 0'35 1'20 1'56 1'34 3'30 1'37 5'06 1'38 6'44 1'41 8'25 1'42 10'07 1'43 11'50 1'43 13'33 1'44 15'17 1'43 17'00 1'32 18'32 4600m 18'32