又一場摸黑上路嘅賽事，因為5點半要到荔景搭第一班列車去迪士尼，計埋行去車站同食早餐時間，五點前一定要出發，另外自己梳洗排毒加埋煮碗麵打底，4點就要起身準備，所以夜晚未夠9點就上床，電視有「長江七號」都唔睇，但係習慣唔係話改就改，就算有勇氣同決心，過程都相當辛苦，結果「長江七號」做完，自己仲响張床度典來典去，幾經掙扎先可以見到周公，真係要佩服有啲人話改就改，話變就變，面不改容，完全無難度無過程無先兆....

沒有月光的夜空，繁星特別明亮，好耐好耐都無見過天空有咁多星星，氣溫雖然有些涼，但慶幸沒有風，空氣都似乎特別新鮮，深深吸一口後，灑開大步，雙腳沒有傷痛，狀態頗徍，感覺良好。

好在有通頂紅 VAN 經荔景，响老麥食完早餐行落光輝圍就有得搭，時間啱啱好，去到迪士尼第一件事當然排隊去廁所，出嚟再去睇地圖，睇下邊度係集合地點起跑區，不過未識分東南西北時，另一班列車又到，成班人向前行，所以唔好執輸，人行我又行，點知去到迪士尼入口先知唔係，應該係後邊停車場至啱，所以呢，唔係人多決定就係正確嘅。

換完衫交埋行李，做足熱身至去起點，有咁多時間又唔早啲企埋去，而家至嚟企隊尾，雞聲响咗都聽唔到，今場賽事好似特別多女士，唔知係咪10k同半馬都咁多錢，所以跑長啲較抵啩，因為太多慢遊人士，加上米老鼠响起點同大家打氣，所以足足行咗一分鐘至到紅地毯計時器，好在之後條路夠闊，唔使左穿右插。一路跑一路提醒自己唔好急，漫漫長路，唔係要快，係要跑得晒，中途上岸就唔好啦；頭10k都好保守，係咁拍住差唔多 pacing 嘅跑手一齊走，男係咁女又係咁，搞到佢地眼望望，好似俾好多壓力佢咁，過咗中段時見到一對女高手一邊走一邊傾，都唔似比緊賽咁，好容易就爬咗佢地頭，但點解跑成10k至追到佢地呢？可能佢地企得前起步，企前啲真係有着數，不過跑咗無耐，其中一個女高手就追上嚟，就搵佢做電兔，跟咗佢幾k，最終都俾佢走甩，而家啲女仔真係好難追，事後這位女士都得分組第1。走咗十幾k，想發力追人，但追極都唔見目標人物，前後跑手保持一段距離，開始有啲悶，力水亦開始下降，右腳成排腳趾收緊，唯有收窄步幅減少後蹬加深呼吸，保持速度放棄追人，完成賽事做到 pb 就算；不過到15k位，同較後起跑嘅10k人士回合，戰鬥力突然提升，可能唔鐘意有人企响前邊阻住，所以加速爬頭，走到最後一個 u-turn 位，發現目標人物同剛才那個女高手就喺對面，仲有大約3k，幾大就幾大，有目標就有鬥心，順便睇下做唔做 under 1:30 都好，雖然想發力開 turbo，但對腳力水硬係差些少，追到去終點都唔見目標人物燈尾，又做唔到目標時間，好失望。

綜觀今日比賽，雖然有足夠休息，但操練不足，哩數唔夠，有心無力，企得太後，唔夠鬥心....睇嚟要達到自己三個願望，要等下個賽季至可以實現。
　

UNICEF Charity Run 1k 4:52 4:52 2k 4:16 9:08 3k 4:24 13:33 4k 3:55 17:28 5k 4:10 21:38 6k 4:17 25:56 7k 4:14 30:10 8k 4:21 34:32 9k 4:11 38:43 10k 4:22 43:06 11k 4:16 47:22 12k 4:15 51:38 13k 4:10 55:48 14k 4:16 1:00:05 15k 4:31 1:04:37 16k 4:06 1:08:44 17k 4:11 1:12:55 18k 4:16 1:17:11 19k 4:09 1:21:21 20k 4:17 1:25:39 21k 4:08 1:29:47 320m 1:14 1:31:01 21.3k 　 1:31:01 　 (晶片時間: 1:30:12)