真係深水起步，起點離碼頭都十幾廿米，想話企响岸邊等開始都唔得，一開始想話照計畫用自由式游足全程，但左右隔離都用蛙式游，為咗保護自己，都要用蛙式游住先，到有空位時又用番自由式游，本應都幾好，因為原本可以過人，可惜自己唔係快，又唔敢博，話晒大海茫茫咁危險，明明過咗對手半個身，但被對手踢兩嘢又要用番蛙式，如是者自蛙輪流用，啲快馬一早上水，自己仲响水中掙扎，上咗水都唔敢望返轉頭，因為唔想知自己係咪最後一個上水，睇下時間，19'XX，預算3'/100m，即係快咗。

離開水面當堂唔同，水上就捱打，陸上就要主動些少，未跑到轉項區都過咗幾個人，戴好頭盔推住單車又過咗幾個，發覺其他人轉項好屎，我咁渣都可以响轉項區過咁多人，時間用咗4'05，上車時仲係跳上去添，跟住就咁搏命踩，其他人仲停低架車慢慢上，但威得唔夠一分鐘，後邊啲車手開始一個一個爬頭，不過好過上次，上次成群咁過，今次隔好耐先有一架過；上次踩車嘅陰影實在太大，真係好驚要落地推車，加上今次條車路有好多暗斜，沿途不停轉波，半奧只踩一個圈，都唔知18k定20k，比起上次「超越挑戰三項鐵人」，條路又長又闊，啲車無上次咁集中，又無人勾車，肉眼所見範圍都係得十零架車，有些少冷清嘅感覺，不過對我幾有利，因為無壓迫感，可以專心踩。踩到最後一公里，見到一齊出發嘅三項同學仔A响隔離跑步區跑緊，就到半程turning point添，真係強，去到落車區睇錶，40'21。

入到轉項區，放低所有嘢，戴帽同黑超就跑，1'50。踩完車再跑步，對腳硬係差多少，開唔到步，唯有密密腳細細步走，跑道上其他人仲慘，大步啲行都快過佢地，約2k位，見到上一組出發嘅另一個三項同學D响對面，佢就弱啲，睇下終點前可唔可以過佢，去到U-turn位掉頭10'57，對腳仲未適應，剩番唔夠2k終於見到三項同學D，對腳亦開始上力，打聲招呼就過佢，進入最後直路，終點前大空地，約500米開始加速，執咗好多件直趨終點，終點有人拉線，加多兩錢肉緊衝刺，衝完仲有工作人員幫你掛獎牌，唔知仲以為自己得獎添，大會真係攪嘢，總時間1:26'02。

玩完都唔得閒，沖身換衫，還車，交晶片，四圍攞嘢食攞嘢飲，又要同人social，不過真係幾好玩，尤其游水，估唔到750m都可以應付，遲下考慮玩渡海泳都好喎。