另一個第一次，去年第一個半馬比賽就係呢個「長跑會第31屆半馬拉松」，加上今次入咗老人組，組別有利，所以一早報名兼部署，天時暑熱都繼續練，打算做好成績。可惜世事難料，首先有跑網師兄要求玩隊際，雖然報咗個人，如果同意就幫我再遞紙，會安排入A隊，既然唔使我理就由得佢攪；之後左膝受傷發炎，迫住停操兩星期，最近病情好轉，急急加操，可惜未夠里數之餘，狀態仍處低位。其後得知隊際要計算全隊名次，即係要全隊完成至可以爭標，自己有傷在身，狀態未起，唔好話做好成績，可唔可以完成都成問題。

前星期玩活力10k，時間要42'幾，時間慢外，仲跑到死死下，為加里數及增加耐力，點都要走轉廿K長課至放心，早幾日最後一課LSD，去到17K就無油，隻腳又只得八成功力，好想搵藉口退出，但始終都無開口，但心理壓力越來越大。呢兩日可以做嘅只係早上牀，休息多啲，希望隻腳快啲好，到時跑得幾多得幾多。

尋晚8點晚飯食咗3大碗飯，9點幾就上牀瞓，430起身煮個麵打底先出門食早餐，去到大尾篤攞號碼布寄行李，簡單熱身後就開跑，今日戰術係死留，一定要捱到終點。起步無耐就上斜，因為企得前，附近跑手水平又唔低，所以上斜無話爭先恐後，大家都係勒住勒住，到落斜位，開始有人發力，自己亦被某幫會兩個目標人物過頭，自己知自己事，今日邊有本事留住人，5K/22'XX，預算之內。轉入烏蛟騰，見到回程啲人距離又唔係太遠，出烏蛟騰右轉落鹿頸，10k/44'xx，1:30'無望，但仍然預計時間之內。半程無睇錶，只因要專心上條長命斜，一路拍住女子第五名一齊走咗好耐，上斜明明過咗佢，但始終放佢唔甩，一到平路又被該女跑手爬頭，就搭順風車，再入烏蛟騰仍可以under control，15k/1:09'，離開烏蛟騰前，見路邊有篤狗屎，心想咋諦避狗屎扑街，上白車咪可以唔使跑囉，不過始終都係幻想，亦可能係中暑休克前嘅徵兆。

最後5k應該係最關鍵，係17k爆定20k爆就睇呢段，一路跟到左轉出新娘潭路，一上斜又過番佢，到落斜又被佢過，但今次唔可以再坐順風車，自己開始無油，落斜係強項都無作為，個腦開始模糊，成日形住前面仲有上斜，叫自己留住留住，對腳又遞唔起，只係好機械性麻木的不斷將後腳向前踏，如果呢一刻休克暈低，我諗對腳都會不停向前踏，離遠見到前面幾個跑手都開慢車，包括第五位女跑手，其中一個仲係行添，但自己硬係連一個都追唔到，最後500米對腳好似唔係自己，只好不停擺手，好似用雙手跑咁，自己雖然好似跑緊返終點，但速度同附近行緊嘅人士差唔多，最後100m，真係忍唔住，望返後邊，見無追兵，索性收步慢jog返終點，留番條命下次搏過。

完事按錶，1:33'30，同去年第一次一樣！？里數不足，狀態低沉，有傷在身，都可以走1:33'，忡走入隊際第二，對得住自己，對得住觀眾啦，但再想深一層，玩咗成年時間，仍毫無寸進，係咪代表呢個時間就係極限呢？

HKDRC 32nd Half Marathon 1k 4'30 4'30 2k 4'03 8'33 3k 4'15 12'49 4k 4'32 17'22 5k 5'13 22'35(22'35) 6k 4'36 27'11 7k 4'27 31'39 8k 4'33 36'13 9k 3'59 40'12 10k 3'59 44'11(21'34) 11k 4'29 48'41 12k 5'34 54'16 13k 5'00 59'16 14k 4'43 1:03'59 15k 4'32 1:08'31(24'18) 16k 4'21 1:12'53 17k 3'58 1:16'51 18k 4'36 1:21'28 19k 4'44 1:26'12 20k 4'42 1:30'55(22'21) 0.5k 2'35 1:33'30 　 21k 1:33'30